Dalgħodu bdejt il-ġurnata ġewwa l-Iskola Primarja ta’ Ħal Tarxien, parti mill-Kulleġġ St Thomas More, waqt sessjoni ta’ qari u attivita’ marbuta mat-Tielet Edizzjoni tal-Qaritona Nazzjonali fl-Iskejjel Primarji, proġett ta’ The Malta Trust Foundation flimkien ma’ l-Aġenzija Nazzjonali tal-Litteriżmu.
Għal darb’oħra tkellimna fuq il-ħsieb wara l-Qaritona Nazzjonali li huwa maqsum fi tnejn. Fuq naħa, permezz ta’ dan il-proġett, naraw li nkomplu nħaddnu fit-tfal l-imħabba għall-qari, u nfakkru li permezz tal-qari t-tfal jitgħallmu kif isiru ħassieba kritiċi. Fuq in-naħa l-oħra ta’ dan il-proġett hemm l-importanza tal-valuri tas-solidarjeta’ u tal-ġenerożita’, għaliex it-tfal, jgħinu sabiex jinġabru fondi li eventwalment jintużaw sabiex jinxtara’ apparat custom-made għal tfal li huma neqsin mill-viżta, jew li huma fuq l-ispettru ta’ l-awtiżmu.