“Wara proġett pilota li The Malta Trust Foundation iffaċilitat permezz ta’ korsijiet ta’ taħriġ dwar Mental Health First Aid għall-istudenti Universitarji, b’kollaborazzjoni mal KSU – Kunsill Studenti Universitarji, il-Fondazzjoni, fl-okkażjoni tal-Jum Dinji għas-Saħħa Mentali, qed tiffaċilita aktar korsijiet fl-istess qasam, għall-istudenti f’istituzzjonijiet edukattivi oħra. Dan qiegħed isir bil-għan li l-istudenti jiksbu l-ħiliet sabiex jegħlbu diffikultajiet ta’ saħħa mentali.
Il-Fondazzjoni qed tieħu din l-inizjattiva mal-KNŻ – Kunsill Nazzjonali taż-Żgħażagħ, għaliex f’policy document maħruġ mill-istess kunsill fuq is-saħħa mentali u ż-żgħażagħ, enfasizzaw l-importanza tat-taħriġ fil-Mental Health First Aid.
Dan it-taħriġ fil-Mental Health First Aid, li ser jitmexxa bl-assistenza teknika ta’ Richmond Foundation – Malta, ser jgħin biex iż-żgħażagħ jiksbu l-ħiliet meħtieġa biex jidentifikaw u joffru s-sostenn u l-appoġġ lil sħabhom li jkunu għaddejjin minn problemi ta’ saħħa mentali.
Jeħtieġ li t-tfal u ż-żgħażagħ tagħna jkunu kapaċi jaffaċċjaw l-isfidi tal-ħajja. Għaldaqstant, bħala Fondazzjoni aħna ħassejna l-bżonn li ninvestu fit-tfal u ż-żgħażagħ tagħna, ħalli jiksbu l-ħiliet meħtieġa, sabiex jkollna komunitajiet b’saħħithom u reżiljenti.”