Mario Coleiro, ic-chairman tat-tim organizzativ ta’ din l-attività spjega kif ‘Festa Palazz’ se tkun mifruxa mill-ġnien pubbliku ta’ Sant’Anton sal-Kitchen Garden. Se jinfetaħ ukoll il-ġnien privat tal-President u fil-Palazz stess se tittella’ wirja esklussiva u interessanti ta’ kwadri tal-gvernaturi fis-swali tal-Palazz. Il-preżenza tal-pubbliku se tkun qed tikkontribwixxi lejn il-fond tal-Malta Community Chest Fund, fejn se tintalab donazzjoni żgħira ta’ 5 ewro għall-adulti, filwaqt li t-tfal se jidħlu bla ħlas.
‘Festa Palazz’ se tkun qed tagħti spettaklu għat-tfal u għall-kbar, b’bejgħ ta’ ikel ippreparat mill-kċina tal-President. Il-Festa se jkollha esibizzjoni ħajja ta’ snajja u artiġjanat Malti bi 18 –il esibitur li se jkunu qed jaħdmu x-xogħol tagħhom. Attrazzjoni sabiħa se tkun fil-ġnien privat bis-sehem tal-Malta Visual Arts Group li se jkunu qed ipittru xeni mill-Palazz. Se jsir ukoll it-tour tal-Palazz bis-sehem tal-Historical Re-Enactment Group of Malta li se jkun animat fl-era ta’ żmien il-Gvernatur Sir Alexander Ball.